Carpe Diem - Сәтті пайдалан!

«Өлі ақындар қоғамы» (немесе кейбір аудармаларда «Бақилық ақындар қоғамы», түпнұсқа атауы — Dead Poets Society) — 1989 жылы жарық көрген, режиссер Питер Уирдің әлемдік кинематографтағы үздік драмалық туындыларының бірі. Фильм үздік сценарийі үшін «Оскар» сыйлығын иеленген. Фильмнің қысқаша сюжеті: Оқиға АҚШ-тағы ең беделді, дәстүршіл әрі қатал тәртіпке негізделген ұлдар академиясында өрбиді. Мұндағы қатып қалған қағидаларды жаңадан келген ағылшын тілі мен әдебиеті мұғалімі Джон Китинг бұзады. Ол стандартты оқу бағдарламасынан бас тартып, оқушыларды еркін ойлауға, өмірді сезінуге және өз дауыстарын табуға шақырады. Ұстаздарынан шабыт алған бір топ студент мектеп қабырғасында кезінде жасырын жұмыс істеген «Өлі ақындар қоғамы» клубын қайта жаңғыртады. Олар жасырын үңгірде бас қосып, өлең оқып, шығармашылық еркіндікті сезінеді. Алайда, жастардың бұл еркіндікке ұмтылысы мектеп басшылығы мен қатал ата-аналардың қарсылығына тап болып, соңы үлкен трагедияға ұласады