Уи пщIэр уи IуэхущIафэрщ. ПАЩТЫ МАДИНЭ

ЛIэщIыгъуэ бжыгъэкIэрэ бэм иугъуея IуэрыIуатэр зэхуэхьэсыжыным, щIэныгъэр и лъабжьэу джыным, зи гуащIэ хэзылъхьэф щIэныгъэрылажьэ зыбжанэм ящыщщ мы бзылъхугъэр. ЕджапIэ нэхъыщхьэр къызэриухрэ а Iуэхум иужь ит зэпытщ. Дэнэ хэгъуэгуи щыпсэу адыгэм тыншу гурыIуэфу адыгэбзэм и сыт хуэдэ зы диалектми уэрсэру иропсалъэ. И къэхутэныгъэ лэжьыгъэхэр зытегъэпсыхьар темэ зыбжанэ мэхъу. Темэ къэси щызэпкъриха тхылъ купщIафIэхэр урысыбзэкIи, адыгэбзэкIи тыркубзэкIи къыдигъэкIагъэххэщ. Щхьэхуэу игъэхьэзыра статьяхэри мымащIэ! ЩIэ гуэр лъыхъуэу илъэс зыбжанэ хъуауэ Тыркум ис адыгэхэм я деж IуэрыIуатэм, антропологием епха къэхутэныгъэхэр щрегъэкIуэкI. «Узыщыгъуазэ ущlэупщlэнщи, узыщlэупщlа птхыжынщ» - жыхуиIэ фольклористхэм я жыIэгъуэм иригъуазэу щIэнзекIуэ зэкъым-тIокъым зэрыкIуар… ЗдэкIуам зырихьэлIа нэхъыжьхэр и нэм и псэм хуехьри, защимыгъэнщI! НобэкIэ Къайсэр къалэ дэт Эрджиес Университетым ирагъэблэгъауэ адыгэбзэмрэ адыгэ культурэмкӏэ кафедрэм егъэджакӏуэу щолажьэ. Зызырипщыта Iуэхур къызэрыдэхъуным игу хуэпхъэру и студентхэм яхэтщ. ИтIани щIэныгъэ Iуэхур зэгъуэкI имыщI. Илэжь илъэпкъри, дыщыгуфIыкIыжу, фIыкIэ къытпегъуэкIыжын Iуэхущ! Зиужь итхэм ящхьэжыращи – анэ гумащIэщ, щхьэгъусэ пэжщ. ЩIэныгъэхэмкIэ дунейпсо адыгэ академием и академик, филологие щIэныгъэхэмкIэ доктор – Пащты Мадинэ!